Es sind vertröimti Winkel und nid Luune,
won en Zäichner maagisch ineziend.
Au mänge graafisch Unbegabti stiend
a som en Egge still und müesti stuune

ab Rütmuss, Muschter, Wächsel im Motiiv:
Grundverschidni Bouten und vier Türe,
Laub und Bluescht us Mäiegschier truckt füre,
und irgetwie würkt alls echli naiiv,

wien e Kulissen im e Mèèrlispiil.
S isch uf der Inslen aber Würklichkäit,
der Uustruck von ere Kultuur mit vil

antiiker Gschichts-Verbundehäit
und Sinn für s Schööni und en guete Stiil.
De liislig Aaräiz zur Vollkomehäit.