Was wien e Schildchrott vor de Küschte liit,
die pugglig Insle mit em lange Hals,
em chliine Hafe, Burg und Turm, und alls
so nööch, das d ales gseesch, nu Détäil niid,
das nimmt bi jedem Blick uf s Meer äim ine,
räizt der d Entteckigsluscht und Pfantasii:
Wèèr sind d Erbouer, wèèr Bbewoner gsii?
De Ritter, wo vom Wassergäischt Undine
verbländet, inezoge, gglockt und dänn
zum Seelespänder wiirt im Hoochsigakt?
Und ooni z wüsse, das er stèèrbi, wänn
de Ggluscht nach eren anderen in phackt.
Was wider zäigt, was ales dine liit,
wänn d mäinsch, du gsèchisch alls. Nu d Détäil niid.
|
|