Di schöön gglockt Daame, won am Naachbertisch,
und a de lèère Fläschli aa scho lang
und intänsiiv, mit eme starche Hang
zu Geeschtik in es Gsprööch verwicklet isch,

chan iri Fründin glaub nid überzüüge.
Für miich chunt die Erschiinig dänn hingäge
als unfreiwiligs Model scho grad ggläge.
Und fiin skizzier ich si i grobe Züüge.

Chan häimli lose bim diskreet Skizziere:
Was die zwäi zäme reded isch nid Tüütsch;
kirgiisisch oder türggisch tüend s parliere.

Bis ich en Satz im Zämehang vertwütsch
und s Idioom chan idäntifiziere:
Di schöön Kirgiisin redt doch Schwiizertüütsch.