Wievil Roggoggo verträit Itaalie?
Dè Schock: profaan vor sakraal isch doch krass
und würkt im Skizzebuech fascht wien en Gspass,
wie Chrottepöscheblueme näbet Daalie.

De Chilen iri locker Schmuck-Fassaade
staat im e krasse Gägesatz zun Wänd,
wo d Huusfassaaden öis eggäge händ
mit irer stiiffe Fäischterschlitz-Paraade.

S isch wie wän Kchile d Läbesfröid wett wecke,
won i de Hüüser schampaar müesti liide
und stieri gääli Huuswänd eme kecke

Gibel de Paschtellschmuck wüürdid niide.
Ch wett niemert mit vercheertem Züüg verschrecke;
Reaalsatiire laat sich nid vermiide!