vom 23. Oktober  2010             
                  
Sèrwiss pübligg?

Im Tüütschen usse säit mer «Daseinsvorsorge», und das Woort schlüüsst zwäierläi ii: e guets Läben und das defüür gsoorget wiirt. Miir sind em Französisch nööcher und bruuched defüür s Woort «service publique». Poscht hät früener au dezue ghöört. Vor driissg Joor hän i emool gwettet, das drei Buechstabe vo mim Name: Ehp. und Pposchtläitzaal vo mim Woonoort langid, das ich e Poschtchaart überchöm. Und ich hä die Wett ggune. Sider und so hät dè Sèrwiss mee und mee nooeggloo.

S Phäckli, won i eme Brüütli zum Hoochsig gschickt hä, isch mit em Chläber «unter dieser Adresse nicht zuzustellen» zrugg choo. En Adrässe, wo scho föifezwänzg Joor ggulte hät. Wil i under de Name «just married» gschribe gha hä, hän i gmäint, s liggi draa, das de Pöschtler em Früe-Änglisch nonig täilhaftig woorde seig. Ich schriibe d Adrässe nomool ooni Änglisch und chume s Phack wider zrugg über. Jetz erkundigi mi phèr Telifoon bi de Bruuteltere, wo bestèètiged, das d Adrässe stimi. Im dritten Aalauff leg i em Phäckli e Nodiz bii zum Pverspöötig z äschpliziere. Jetz chunt s Phäckli aa und mit eme Dankbriefli d Erchlèèrig zrugg: Am Briefchaschte heig e paar Tääg s Täfeli mit em nöie, zwäitäilige Familiename gfèèlt…

En Brief händ s mer mit em gliiche «Nichtzustellbarkeitsaufkleber» zrugg spediert. Im ene Telifoon hän i dän erfaare, das d Adrässe gälti und sid über driissg Joor di gliich seig. Uf em Briefchaschte stoot aber eben em Maa sin Name mit Toktertitel. Und ich hä de Brief a Pfrau Mäier gschribe. Nach miire Reklamazioon uf em Poschtamt hän i dän zum Trooscht e Föiffranke-Briefmaarggen überchoo.

Diemool und so chömed grad zwee Brief vom gliichlige Bestimigsoort mit em bikannte Chläber zrugg. Beed vo Mane, wo sid vierzg und sächzg Joor deet woned, der äint langi Ziit als Gmäindspresidänt. Ich luegen im Telifoonbuech nooen und gseene, das beed no am tupfetgliichen Oort woned. Nu das di alt Oortsbezäichnig jetz no en Stroossenamen und e Numere hät. Ich wott uf em Poschtamt reklamieren und erfaare, das es i dère Gmäind sid Jooren ekäs Poschtbüro me git. Und sider au dè Sèrwiss pübligg nüme. Vo «Daseinsvorsorge» scho gaar nüd z rede.