vom 27. Februar 2010         zurück zur Rubrik    
                  

Stuben-Olümpiaade

De Tokter hät mer empfole, wüchetli zwäi-, drüümool e Stund go z lauffe, zum s Winter-Defizit vom Körpertrèning uuszgliiche. Sider und so hän i imer e schlächts Gwüsse, wänn s mer nüd en äinzigs Mool i de Wuche ggrooten isch: nüd z Fuess, nüd mit de Schneeschue, nüd uf de Langlauffschii. Drumen und so isch s mer ggläge choo, das i hä chönen es Stubewelo eerbe, eson en Houmtrèèner, wo d zu irget ere Ziit no e Stündli chasch vor di hère pedaale. 

S Welo hän i im Häimkino hinder Ppolschter vor em Fèèrnsee gstellt und chan iez mit Blick uf de Bildschirm drufloos strample. Da chunsch im Fall zur Olümpia-Ziit der ultimatiiv Kick über, wänn d am enen Iis-Schnälllöiffer quaasi chasch nooeseckle. Lang hän i s nüd uusghalte hinder em Gold-Holänder Mark Tuitert noo, aber doch vo sim Windschatten e Wiili profitiert. Bi de Fraue, tänk i, haltisch es vilicht lènger uus und hä mi a d Biathlonischtin Magdalena Neuner ghänkt. Bi dän aber häilfroo gsii, wo die scho bald ase ränzligen uf e Matte gglägen isch zum mit irem Stutzer uf eso zwiifelhafti Schiibli z chäpsle, und ich hä chöne vertschnuufe. Hinder den alpiinen Abfaarer vergoot der s Strample. Seig s de Bodemüler, de Ggüsch oder de Defaago, mit äim Bäi stönd die imer im Rettigsschlitte. Ussert vilicht im Slalom. Doo chasch im Rütmuss vo de Schwüng i Ppedaale stampfe. Esoo hän i em Silvan Zurbrigge no bi de letschte Hundertschtel für siini Brongsemedalie chöne hälffe. Aber weder de Hüpp- no de Russi händ daas in irem Komäntaar erwèènt.

De Komäntaar vo miire liebe Frau Verandaa isch doo klaarer: Iez müestid mer s Stubewelo no soo chöne mit em Fèèrnsee zäme schalte, das er nu dänn Stroom überchunt, wänn d duu stramplisch.