vom 24.  Oktober  2009              
                  
Offes Oberland 


Als Täil vom Glatttaal isch s Oberland zwüschet Grüenigen und Dürten offe gäg em Züri- und em Obersee. Vo deet sind di röömische Händler und Kohorte vo de See- uf d Landstrooss dur s Oberland choo, händ ires Gält, iri Kultuur proocht, ales Wältschi, wo hüt no us Waliken, em Wältschebèèrg und em Walebach töönt.  

Vil vorane sind in irne hölzige Kanu di eerschte Puure choo, won als Pfoolbouer an Oberländer Séée gsidlet händ. Aber vo unenue, d Glatt duruuf. Wie nachane d Alemane, won au no s Töösstaal uuf choo sind. Vil spööter au d Strooss und Bbaan vo Wintertuur und im Glatttaal vo Walisele hèèr. De gliich Wääg händ vorane Pfranzoose gnoo und dur sii di liberaalen Idéée mit em Uschtertaag als Signaal vo nöier Offehäit.

Sogaar deet, wo s Oberland im oberschte Töösstaal vom Pirg abgschlossen isch, sind de Komfässioonsgränze z trotz eso Tüürli uufggange, wo d Oberländer Sprooch is Sanggalisch dure schloot: Vom Oberholz über Goldige bis uf Gomiswald cha «zmool am e Pfool en Troot loo und e Gschoor Schooff über d Strooss goo.» Und über d Hulftegg und de Ricke händ Toggeburger Zimberi di alten Appizäler Hüüser mit irne häimelige Quèèrfiirscht i d Töössbèèrge proocht, wo Hinderwäldler Chräche vom Stèèrnebèèrg bis uf Stroolegg zu schööne Zäie vo Offehäit mached.