vom 24.  September   2009              
                  
Grüeni Tüüme 


Vo de grüene Tüüme, wo men ere gschickte Gèèrtneri zuemisst, hät miini lieb Veranda vier zguet. Was sii in irne Rabatte, Chübel, Töpf und Chischtli zwäg bringt, im Chrüütergèèrtli und de Rooserondell, das isch äifach en Traum vo Schööni. Was doo s ganz Joor vom Levkoje-Söömlig bis zum hööchen Isehuet wachst, blüet und pletteret, das hät so vil Farben und Forme, das en Soome-Muuser-Kataloog en Dräck isch degäge. Won i miini Gèèrtneri fröögen, öb si mit irne Hortänsie- und Fuchsie-Landschafte, irne Buchsbaum-Strubelchöpf und Begoonie nüd wett am Bluemeschmuck-Wettbewèrb mitmache, do mäint si, das seig nüd nöötig, si wüssi jo, das es schöön seig.

So schöön s eerscht Uufblüe im Früelig und d Sumerpracht vo de maschtigschte Ziit sind, eso gmögig isch s langsami Verblüe im Hèrbscht. Und je mee s em Winter zue goot, descht lüüchtiger blinked di letschte Roosen und Rudbeckia, Aschtere, Taalien und Chrisanteemen us em verfèrbte Laub.

Öppis vom Schöönschte sind all die Gescht, wo miini Bluemefrau mit irem Wèrch iiladt: die Schwärm vo Biili und Sumervögel über em Flox und de Fetthäne. Der Igel in Chruselbeeri. Di chupferöigig Chrott zwüschet de Basilikumchübel, Graasfröschen under em Pfäffermünz. Und hüttemorge drei Dischtelfink-Päärli a de verblüete Suneblueme.