vom 25. Mai  2009              
                  
Obacht, fromm!

A Füerigslüüt leged mer strängi Maassstääb aa. Das hä mer mit dèm Armeescheff erläbt. S gliich gilt für Wiirtschafts- und Chilefüerer. Die settid voorbiltli fromm sii. Umso enttüüschter si mer, wänn se sich als verlogen und hüüchlerisch erwiised. Doo dezue isch mer en Uussaag vom ene Pfarer plibe, wo de Vatter vom abgwèèlte Bundesroot und sim Schafuuser Pfarer-Brüeder isch. Won er doo im Oberland gwürkt hät, isch dèm Vatter in ere Predig emool useggrutscht: «Hütet euch vor den Frommen!» – «Èèr mues es wüsse», hän i tänkt und hä mi sider in Acht gnoo. Es isch woor: Diene, won am vollmundigschte frömmled, sind emänd nu Süessholzraschpler. Zwüschet Woort und Taat gönd Abgründ uuf, seigid s Bischoff, Pfarer, Staats- oder Chilepresidänt, vilicht au nu Stündeler.

Bim Schafuuser Pfarer-Brüeder hä mer erläbt, wie Frommsii chan i Mäntscheverachtig und Überheblichkäit umschloo. Äigeschafte, wo chöntid i de Familie ligge. Nach siire Waal hät de Bundesroot-Brüeder eme Reporter is Mikrofoon gsäit, mit Gottes Hülff wel er s probiere. Ooni z erchlèère, wele Gott. Wèr s Gliichniss vom Kameel und em Naadelööri känt, chan als Miliardèèr chuum de Gott vo de Bible mäine. Drum händ mer doo d Woort vom Vatter in Oore gglüütet: «Hütet euch vor den Frommen!»