vom 21. April 2009          zurück zur Rubrik    
                  

Käi Reporter!

Wänn vom Fèèrnseeluege d Reed isch, ghöör i öppe säge: «Ich luege wenig, aber all Taag d Tagesschau. Wottsch doch imformiert sii.» Debii find i daas öppe di schwèchscht Imformazioonssändig. De Zwang, zu jedere Noochricht Bilder z zäige, länkt vom Wäsetlichen ap.

Waas in aler Wält hät em Sarggosi sis Hosebäi für en Imformazioonswèrt? Oder de Flic am Elisee-Portaal, won en grüesst? Die Manerundene mit dène soublööde Lächligsichter? Pfrä Mèrkel mit em nöischte Schaggettchläid, won eren au nüd besser stoot weder s geschterig? E halbi Sekunde lang en Laschtwage, wo mit Soldaate devoo faart? S chöntid ales Bilder vo fèèrn oder vorfèèrn sii. Zur Sach säged s sovil wie nüüt.
Klaar git s au anders. En Überschwämig, suscht e Natuurkataschtrooffe oder Bilder vom ene Volksfäscht. Aber imer z churz. Die chönti mer lènger und tüütlicher zäige, wä me de Schrott ewäg lies. Und di säbe Noochrichten em Raadioo überlies, wo sich gwönt isch, öppis über s Woort aaschauli z mache.

Und dänn di überflüssigschte Bilder, wo s überhaupt git: Kameralüüt bim Knipsen und Filme. Ich wott doch, gopfertoori, käi Reporter gsee im ene Pricht über Bbundesrootswaale!
Er chönd wäge miir e halbi Sekunden en Laschtwage vole Soldaate zäige. Aber käi Zäätelssekunde lang Reporter!