vom 2. Februar  2009              
                  
Kompänsiere


S fallt grad uuf, won i d Tochter psueche: S schmöckt in irer Wonig nüd vo Röicherstääbli. «Ich kompänsiere», säit si, «ch nime moorn en Biligfluug uf London. Drum verzicht i uf Duftröichli. Wäg em Fiinstaub.» – «Lönd Si s nuur», säg i zur Chällneri, wo s Cheerzli uf öisem Tisch wott aazünde. «Mer ässed ooni Cheerzeliecht. Nööchscht Monet gö mer uf Chrüüzfaart mit eme Riiise-Disel-Schiff. Mer kompänsiered.» – «Ich phalte miini Dräckschlüüdere vo Allraad», säit der Abächerli, «und kompänsiere mit ere Zalig, won en anderen als Prèèmie überchunt, won e süüberers Auto faart.» Bim Apéro i siire Wonig flackered im Schminee künschtlichi Flamen uf eren Aart Bildschirm. «Ich kompänsieren au bim Schminefüür», säit er. «Zugunschte vo Enèrgii-uufwändige Iwènts vo miliooneschwèère Popstaars z Dübedoorff. Und das d Patrui Swiss uf Choschte von öis Stüürezaler mit eme Schauflüüge chan eröffne.» – «Ich ha s grad gliich mit em Verbräne vo mim Chrischböimli», säg i. «Ich verzichten uf s Plausch-Verbräne mit Glüewii und Grilaade. Wäg em Fiinstaub. Zugunschte vom Motocross i de Gmäind.»

Kkonsuumkult-Mènètscher und die Näbelhörner vo tumpfbaggige Politiker chönd rüebig vor sich hii rüüche. Mer kompänsiered s mit de Flämmli vo de konsuumgäile Blöödhäit, wo no in is glimed.