vom 12. Dezember  2008          
                  
Übergwicht und Kaloriie



Wèèr s emool hät, bringt s nümen ewägg, redt mit de Ziit wien iich vo «Undergröössi». Wil er z chlii isch für s Gwicht, wo er uf d Woog bringt. Ich stoonen efèng nüme drufufe. Em eendschte wüürd i druff ligge. Das nüd all eso ufenand pigne Kilopond denand no hälffed, uf d Woog abe z trucke. Aber probiered Si emool, ase ränzligen oder äärschlige die chäibe Lüüchtzaalen abzläse!

Und die Schlötterlig, wo d für diini Rundige chasch ghööre: Phauke, Pirelli, Pier-Tumoor. Debii sind daas bi miir Muskle. Min Tokter säit ene Verdauigs-Muskle. Ander reded vo «Musklen und Saamesträng». Das chunt de Sach scho nööcher.

Dänn pschtändig das Gjöömer wäg de Kaloriie. Uf jedere Phackig stoot de Brännwèrt vo jedem Gramm, wo d zue der nimmsch. Wänn nüüd, dänn säit der s irget son en ernèèrigsbewusste Mäntschefründ. En fröidloosen Askeet ooni Sinn für gnussriichs Ässe. Ooni Gschick für e wèèrschafti Chuchi. Wänn d emool biin em dihäi issisch, mèrksch, werum er so schlank isch: Trülisch sin Fuud eso lang im Muul ume, bis all Kaloriie vergange sind. Dèm wüürd nüd emool e Wurmkuur hälffe.

De Nöischt hät mer iez en prominänte Tokter verroote: Kaloriie sind munzig chliini Wäse, won i de Chläiderchäschte vo Textiil-Fuseli läbed. Si mached, das Kchläider imer chliiner wèèrded.