vom 23. August 2008      zurück zur Rubrik    
                  

Olümpia 


Nüd us aktuelem Aalass, wäg eme tume Schnitzer, hän i mit eme Wältmäischter abgmacht. Nach liederliche Röschèrsche hän i im Stadtchräis-Plettli vo Oberwintertuur vom ene «Dritte an Kunschtturn- Wältmäischterschafte 1950 z Basel» gschribe ghaa. Siini Frau hät stantebeeni de Redakzioon der äxakt Sachverhalt gmäldet: Iren Èèrnscht Gäbedinger seig doozmool dreifache Wältmäischter woorde: im Pfèrdsprung, im Bodeturnen und i de Mannschaftswèrtig. – Und iich hän us eme Dreifache en Dritte gmacht. Soon e Blamaasch! Im ene Briefli veräxgüsier mi und schloonen es Gsprööch voor zum alls i der Oberi-Ziitig z berichtige. Glii drufabe sitz i im Gaarte vom rüschtige Räntnerpaar und plettere bi Kafi und Trüübelichuechen im Suwöniir-Album vom Wältmäischter dur Wettkampf-Röportaaschen und Fotene. Debii chunt s drufuse, das de dreifach Wältmäischter a der Olümpiaade 1952 z Helsinki mit de Schwiizer Kunschtturner au no Silber gholt hät i de Mannschaftswèrtig. A dèren Olümpiaade, wo d Schwiizer Turner mit jee zwäimool Gold und Silber und dreimool Brongse grooss abggruumet händ. Äini vo dène Silbermedalie hanget uf rootem Tuech is Gäbedingers Stube, zoberscht über de drei Goldmedalie vo Basel. – In Olümpiaade-Pricht vo Peking isch devoo d Reed gsii: Olümpia stoot über de Wältmäischterschaft!