vom 29. Oktober  2007         
                  
Buss-Kumferänze 


S chunt in Oberländer Büss voor, das me mit öppertem redt, und öpper ander mischt sich ii. Diemool triff i im Buss en Bekannte, wo säit, er heig miini Karikatuur im Aazäiger vo Uschter gsee, won i d Uufhebig vom Flugplatz Dübedoorff uf d Schippe nèm und Aarbäiter us der Uufschrift «Düsendorf» s «S» usenèè und es «B» ietue lös, das es wider «Dübendorf» ghäissi. Doo mischt sich en jüngere Tüpp ii und säit, er heig ghöört, wänn dänn de letscht Militèèrchopf no ggange seig, dänn chönid d Dübedoorffer au no di bäide Null in irer Poschtläitzaal 8600 uuswächsle…

Emool händ irer drei über d Spaarerei duurume ggredt. Mer hett s sölen uf Band uufnèè und de Politiker schicke. Won äine säit, d Regierige sölid bi siich sälber aafange spaare, do misch mi sälber ii und säge: «De Bundesroot hät ja scho lang bi siich sälber aagfange. E Ziit lang hät er doch mit sächsehalb Bundesrööt gfunkzioniert. Das hän ich als Spaarmaassnaam verstande. Und sit e paar Joor mäint er s ganz èèrnscht, und er regiert mit sächs und ere Null-Numere.» 

Zwee us de Spaar-Rundi lached graad use. Nu de dritt bliibt èèrnscht und lueget mi zimli giftig aa. Aber er verchlämmt s und frööget nööd, wèn i mit de Null-Numere mäini. S «Sächsehalb» hät en em giftig Luegen aa uf di rächt Spuur proocht…