vom 24. August  2007           
                  
Automaate-Föteli 

Es Echo chan emen öffetliche Schriiber zäige, das er d Fantasii und d Erinerig vo Läser bewegt hät. Uf miini Kolumne «Zigerette-Stopp» schriibt mer en Läser sogaar uf Züritüütsch: «Sucht isch für miich käs Theema. Ich chan alem widerstaa, ussert de Versuechig... (Isch zwar nüd vo mir, passt aber nüd schlächt.) Rauche han i zwaar emaal aagfange, mit Pfiiffe, so schaurig intellektuell, ha so schrèèg prüeffend driigglueget, und dän vo dère Poosen e Foti gmacht im en Automaat. Wo s Biltli usechoo isch, han i d Pfiiffe furtggrüert, wil i so huere tublig uusgsee han. Und nie me ggraucht. Sider chan i, wä mer mi bin eren Unaart vertwütscht, imer säge: ‹Defüür rauch i nööd.›» 

Die Gschicht mit em Automaate-Föteli hät bi miir es Gedèèchniss-Schubläädli uuftoo us de Ziit, won i no em Fèrie-Verräis-Zwang underworffe gsii bin. Im letschte Momänt hän i doo gmèrkt, das i no muen e nöiji Idäntitèètschaarte haa und hän im enen Automaat (doozmool no schwarz-wiiss) eso Föteli gmacht. S isch zur Ziit vom tüütschen RAF-Thèror gsii, und miini Biltli händ uusgsee wien uf säbne Thèrorischte-Faandigsliischte. Won i s em Gmäindschriiber zum Iichlöibe gibe, mäin i, ich mües mi no defüür entschuldige. Do säit dèè zum mi trööschte: «Ich hän scho vil verreckteri iigchläbt.»