vom 6. August  2007       zurück zur Rubrik    
                  

Rauch-Stopp 

Me wäiss es, me wäiss es, me wäiss es. All, wo s ne scho der Eermel iegnoo hät, und das sind nöd wenigi, die wüssed s: Ere Sucht isch, allne Waarnige zum Trotz, schier gaar käi Chruut gwachse. Seig s bim Ässe, Trinken oder Rauche, s isch en eebigi Müesaal, doo e Gwonet wele z ändere. Debii sind das eerscht drei vo de vier schöönschte Sache. Und de dritte wett i die Kolumne widme. Mit de Fröid, won i mit ere Ziitgnossin täile, wo s würkli gschaffet hät.

Ere junge Frau (all Frauen under füfzgi sind für miich jung), dère junge Frau isch es also ggroote, vom Rauche loos z choo. Wil dè Schritt zu de gsundhäitlichen au no e gfröiti ökonoomischi Siite hät, isch si uf d Idee choo, s Gält, wo si nüme für d Zigerette pruucht hät, uf d Siite z tue. Nach eme Vierteljoor hät si nöd schlächt gstuunet, wie vil Chlotz im Tubakspaarkässeli zämechoo isch. Si hät pschlosse, si well das Gsparti drittlen und mit irne zwee Mane täilen, em Eheliebschten und em Soon churz vor em Pubèrtifizitèètsalter: «Täilti Fröid isch toppleti Fröid.»

Die beede Mane händ au Fröid zäiget und dè unverhofft Zuestupf in iri liebschte Hobby aaggläit: De Soon i son en ultra-chliine Musik-Spiicher und -Abspiler mit Oorestöpsel. Und der Eheliebscht? I waas ächt, waas? – I zwoo Stange Zigerette!