vom 14. Juni  2007           
                  
Hirnibickereie

E Chue erfaart vo anderne, si importierid zu irne Chuefläden ane no huuffewiis Chuemischt vo wäiss de Gugger wohèèr. «Blöödi Chüe», isch iren Komäntaar dezue.

Gäns veraastalted in irem Gansgaarten en internazionaale Gänsemarsch, händ nachanen uf em vertramplete Ggländ nüüt me z frässen und verhungered. Komäntaar: «Sälber gschuld, tumi Gäns!»

En Wald voll Affe ghöört, Golfe seig trèndiger weder Liaane-Hangle. Si lönd iren Uurwald abholzen und leged en Golfplatz aa. «H… Affe», isch de Komäntaar.

Uufgchlèèrti Schwiizer gspüüred d Folge vo Fiinstaub, CO2-Überschuss, Lèèrmüberfluetig und Kliimaa-Erwèèrmig. Si faared langsamer und mit spaarsameren Auto, stiiged uf öffetliche Vercheer und s Welo um, boued Partikelfilter, Solaar- und Windchraftwèrch, nützed Sunen- und Èèrdwèèrmi, reglemäntiered Häizige, Chüelschränk, Boumaschine, Rasemèèier, Schminéfüür und schwafled vo Umwält- und Kliimaaschutz, Energiikonto und «2000-Watt-Gsellschaft». 

Defüür händ s jetz Pischte für Autoräne vo de Formlen äis z guet und z Bääretschwiil es Super-Motard zmittst im Won- und Erholigsgebiet Zürioberland. 

– Komäntaar?