De Turi Oberli

Miini Füfzgischt

50. Oberi-Mundaartkolumne
vom Richart Eereschpèrger

Zää Jaar lang
Vor zää Jaar han i de Turi Oberli geboore. Nid under Schmèèrze, wie daas öisne Frauen uuferläit isch. Nu wil i als Furtsetzig vo miine Jugeterinerige «Äin vo Oberi» die Mundaartsiiten i der Oberi-Zytig ha töörffe phalte. Die Rubriik, ha mer gsäit, sett wiiters «Oberi» im Name haa. Und mit «Turi Oberli» sind grad Aafang und Ändi vom ene vertrületen «Oberwintertuur» verwuurschtet gsii. Ämel vom Tööne hèèr. Us Rücksicht uf Läserinen und Läser, wo sich mit Mundaart Läsen echli schwèèr tüend, han i probiert, die Artikel e bitzli chürzer abzfasse weder die 31 Folge vorane, wo dänn s Buech «Elise, Glettise, Gumischue» druus woorden isch. Und iez bin i scho bi miire füfzgischte «Turi Oberli»-Kolumne. 

E gmischts Fadezäindli
D Theeme von ere Kolumne sölid ja us em Läbe ggriffe sii. So han i us Politiik und Wiirtschaft, Meedien und Wèrbig, von Jaaresziiten über s Gèèrtneren und Pfitness alegugger duregchätschet. Dezue ane han i gwüssni Ziitgnossen echli under d Lupe ggnoo. Au was mer öppe vo «Winti» ghöört, Züüg us de Schwiiz, sogaar Patriotisches, de «Service public» isch uf s Tabeet choo, und imer wider öiseri Spraach, wie mer reded. Klaar, in ere Mundaart-Spalte. 

Schööni Echo
S Schöönscht für öpper, won öffetli schriibt, sind imer wider d Echo uf das Gschribni. Läserinen und Läser, wo sich mit Mäinigen und Kritiik mälded, mit Erinerigen und äignem Erläbe. Won i s letztsch Jaar am ene Konzèrt im Stadthuus z Winti ugsinet em Stadtpresidänt gägenüber gstande bi, han i mit em aafè plaudere. Und won em min Name säge, mäint dèè: «Ja ja, Iren ‹Turi Oberli› lis ich imer i der Oberi-Zytig.» Chliini Glanzphünkt sind imer au d Raadioosändige gsii, won i bi DRS 1 mit Oberi-Gschichte ha chöne mache. Irer föif sind s gsii zwüschet 1998 und 2008 i de Räie «Schnabelweid». Als Uufsteler han i vor drüü Jaar chöne verzele, das im nöie «Züritüütsche Wöörterbuech» (NZZ-Verlag, 2009) drei Beleegtäggscht us «Elise, Glettise» stönd, wo siinerziit als Voorabtruck «Äin vo Oberi» i der Oberi Zytig choo sind.

E rundi Zaal
Füfzg isch e rundi Zaal, zää Jaar grad au: En Abrundig zum Uufhöre. Zum ene Ziitphunkt, wo s mi tunkt, d Mundaart heig trotz em Überhandnèè vom Änglische wider mee Gwicht, und d Lüüt achtid sich wider mee druff. S isch schöön, das ich im Oberi-Stadtchräis-Plettli en Biitraag zur Mundaartpflääg ha chöne läischten und das mer miir debii jedi Freihäit gglaa hät. Au Pfreihäit zum Uufhöre. Tanke vilmaal!