zurück zur Rubrik
                  

De Turi Oberli

Entschuldigung!

49. Oberi-Mundaartkolumne
vom Richart Eereschpèrger

E Schuld belades Jaar?
S muen e Schuld belades Jaar gsi sii. Ämel isch um de Jaareswächsel ume imer wider vo Entschuldigunge d Reed gsii. De tüütschi Bundespresidänt hät sich mee weder emaal müesen em Volch in aler Öffetlichkäit erchlèère. De Schwiizer Nazionaalbank-Presi isch in en èèndlichi Laag choo, und en Bundesraats-Aawèèrter hät sich bi siine Koleege vo de Bundesversammlig sogaar schriftli entschuldiget.

Pform sälber paschtlet
«Ich entschuldige mich in aller Form», hät de Bruno Zuppiger siine Parlamänts-Koleeginen und –Koleegen im ene Brief gschriben und uf iri Bundeshuuspültli lege laa. Gmäint hät er d Schuld, won er als Tröihänder mit eren Eerbschafts-Veruntröijig uf sich gglade hät. Und die Schuld hät er sich grad sälber vergèè. In aler Form, wien er mäint. Nu das er die Form sälber paschtlet hät. S isch siini, nid «aller» Form. Wil mer sich sälber gaar nid chan entschuldige.

Entschuldige ghäisst vergèè
Enschuldige chönd äim nu diene, wo von öisere Schuld betroffe sind. Und dène müesti en Schuldigen erchlèère, wien er i die Schuld ggraten isch und ene säge, mit weler Iisicht èèr die Schuld beröit. Iez chönt er um Entschuldigung aahalte, uf Tüütsch gsäit bitte. Und di Betroffne chöntid uf die Bitt iigaa, in entschuldige, im vergèè. Das wèèr e Form, wo Formaat hett. Wän äin aber uf eme hööch gnuegne Ross hocket, chan er ebe die Form sälber bestime und sich stantebeeni sälber entschuldige. Das sich ganzi Religioonen um s Theemaa «Vergebung der Schuld» bemüend, mues en Mäntsch mit Machtsträbe nid kümere. Er cha seeleruig demit rächne, das s Umfäld no gliich naiiv tänkt wien en Schuelerbueb, won e Schiiben iiggrüert hät und d Mueter zuen em säit: «Gang di bi de Frau Hueber go entschuldige!» 

Ggwitzteri Presidänte
De Schwiizer Nazionaalbank- und de tüütschi Bundespresidänt händ daa vilicht iri Beraater, won über di umgangsspraachliche Redesaarten uus tänked. Drum händ beed um Enschuldigung pätte, wo s ires fèèlerhaft Tuedium zueggèè und beroue händ. Nu das s natüürli imer nur eso vil zuegänd, wie men e cha bewiise. Das hät bim Bankpresidänt dänn gglanget, das er zruggträtten isch. Bim Nazionaalraat Zuppiger waartet me no uf dè Schritt. Siini Wèèler rächned eme hööchrangige Politiker nämli e Veruntröijigs-Schuld eso hööch aa, das se si nid entschuldiged wie Pfrä Hueber em Hansli di iiggrüert Schiibe.