De Turi Oberli


Fuul und tröi

47. Oberi-Mundaartkolumne
vom Richart Eereschpèrger


Im ene «Landsturm-Widerholiger» hä mer zwee kuurligi Tèètel i de Kumpenii ghaa. De Hugoo, en fuule Hund, won en d Huut aalanget, militèèrisch gsäit en Trückebèrger. Aber uufgstellt und gselig. Mer händ von em erfaaren, er läbi eläi, schaffi füfzg Prozänt im ene Boumèèrt und chöm esoo dure. 

Dänn der Èèrnscht. Dèè isch i Ziviilchläider iiggruckt, ooni Waffen und Uusrüschtig, Haar bis über d Achsle. Uf Pfraag vom Haupme säit er, er heig vor Wuchen als Obdachloose sis Militèèrzüüg us em Elterehuus müese hole, wil di Alten i Pfèrie seigid. Im Zürcher Haa-Bee heig er s iigstellt und iez, won er s well go hole, choschti daas sächzg Stäi. Die heig er niid. Do git em de Haupme en Hunderterlappen und de Befeel, er söll das Züüg go iilöösen und mit em Räschte zum Ggwafföör. Der Èèrnscht hät daas gmacht, und won er i der Uniform zrugg chunt, hä mer en chuum me kännt. De Frisuur «Ggupp mèsong» und siire Faanen aa hä mer gmèrkt, das er d Haar und s Gält nid bim ene Figaro loos woorden isch. Im Uusgang hät s em dänn nomaal für es Pierli gglanget. Er isch debii wisewii vom Hugoo gsässe. Do säit dèè zuen em: «Èèrnscht, das machsch nüme: s Militèèrzüüg im Baanhoof go iistele. Chasch es doch bi miir dihäi i min Schlupf tue.»

En Gfitztere weder iich, nid nur en Tèètel, defüür en Offizier vo de französische Luftwaffe, hät vor 68 Jaar gsäit: «Tröi und fuul chan äin uf s Maal sii.»*

*Antoine de Saint-Exupéry, 1900-1944 in «Le petit prince», 1943.