De Turi Oberli


Em Nüssli sin nöie Staatuss

46. Oberi-Mundaartkolumne
vom Richart Eereschpèrger


En Profi duur und duur
S heig bi de Guggumeren aaggfange, verzellt mer de Nüssli-Phaul. Von im säit men öppen, er seig dèè, wo de Nüsslisalaat erfunden und grüen aagstriche heig. Das hanget nid nu mit sim Name zäme. Au siini Aarbet lampet i dè Gspass ie. De Nüssli-Phaul schaffet scho sid i wäiss bim ene Gmüesler. Angro, mit Plantaaschen und ix Gwächshüüser. Und er isch mit Liib und Seel debii, das em ooni wiiteres en Erfindig i siire Brangsche zueztroue wèèr. Und daas, won er säit, s heig bi de Guggumeren aagfangen, isch eson öppis wien en Erfindig. En Entteckig nämli.

Mit Halt en Aastupf gèè
In Nüssli sin Zueständigkäitsberiich ghööred hunderti vo Meeter Triibhuus-Gurke. Die mue mer sich nid wie bim ene Hobypüntiker bodezeben uf eme Komposchtwall voorstele. Die Ertraags-Gurke chlädered a Schnüer sänkrächt i d Hööchi. Debii hebed die siich mit Ranke, wo s um d Schnüer und d Naachberpflanze wickled. De Nüssli hät iez erlickt, das die Gurke vil zügiger wachsed und Blüete triibed, wän er de Ranke hilfft, Halt z finde. Mit vil Fingerspitzegfüül füert er s im rächte Ziitphunk a d Chläderschnuer oder an en Blattstiil von ere Naachbergurken ane, wo die sich subito e paarmaal drumume liired. «Sobald s mit irne Chrangel Halt finded», erchlèèrt de Nüssli-Phaul, «gaat d Mäldig i Bbewusstsiis-Zäntraale vo de Pflanze: ‹Befeschtiget, wiiter wachse, Blüete triibe!›» Isch äigetli no ganz plausiibel, wä me gseet, was für es Gwicht nachane die Guggumeren a d Uufhänkig bringed, und deet wie zümpftigi Salaami obenabe plamped.

Rändaabli Hülff
Uf zwölf Prozänt Meerertraag hät s em Nüssli siini Metooden i de Gurkeprodukzioon praacht. Doo hät en sin Scheff uf Kchhäfen- und Èrbseplantaaschen aagsetzt. Er hät em Phaul drei Mitaarbäiter understellt, wo de ganz Taag de Ranke hälffed, Halt am Chläderggrüscht z finden und esoo bi de Hülsefrücht no di gröösser Produkzioonsstäigerig anepraacht weder bin Gurke. De Nüssli-Phaul cha daas au uf sim Lookonto abläsen und uf eme Diploom sin nöie Staatuss dokumäntiere: «Eidg. dipl. Rankenhäkler». Ooni Witz.