S' Schnaarchlizimer (Textprobe)

 

Won i nämli am Morgen im Masselaager vertwachet bi, mèrk i, das es ggliechtet hät under de Schlööffer. Ich ha zwaar miiner Läbtig scho gröösseri Hütteschlääg lèèr gschlaaffen, aber s hät mi doch beuuruiget, das d Margrit und de Viktoor und drei Friburger gfèèlt händ, no bevor s rächt Taag gsii isch.

Won i in Tagruum abe chumen, isch d Margrit scho am Zmorgetisch-Richten, und de Viktoor chunt, zimli grüen im Gsicht, mit Milch- und Kafichrueg us de Chuchi unenue. Si heigid ekäs Aug zuetaa im Schlaag obe, verzeled die bäide. Eson en Gang heig i bim Schnaarchle no nie ietaa, defüür sii d Ooropax. Das heig aber nüüt praacht, wil gäg die Regischter, won iich zoge heig, ekäs Chruut gwachse sei. Drum heigid s dänn gäg di halbi drüü de Blind gnoo zur Hütten uus is Phaarkplätzli aben und heigid uf de Ligisitz von irem Auto no en knapp dreistündige Nicker anetätscht. – Miini Entschuldigunge sind gwüss uuphulffe gnueg gsii, und d Erchlèèrig mit em Chianti Ruffino, capsula blù, han i us Rücksicht uf de Viktoor nid chöne bringe, wil èèr dèè amigs im Mendrisiotto i vertäilbaare Mängenen über Ggränze schmugglet und für öis unenue bringt.

Die bäide Fründ wèèrid, won öisi Gruppen am Zmörgele gsii isch, zimli di bläichschte Ziitgnossen im Tagruum gsii, wänn nid grad Pfriburger iechoo wèèrid. Pfrau heig eren im Wäschruum verzellt, säit d Verandaa, de Maa seig mit de gröössere zwäi Chind am Morgen am vieri uf en Waldlauff ggange, wil s nüme heigid chöne schlaaffe. Sii sei bi de drüü Chliinere plibe, wo gschlaaffe heigid wie Herrgöttli. Und sii, si heig dän au no öppe zwoo Stund d Auge zuetaa. Miir isch s niene rächt gsii, aber was han i wele mache?

S Theemaa am Zmorgetisch isch natüürli ggèè gsii und d Rundi sich äinig: Ich han öppis müesen undernèè. Als eerschts de Schang interwiuue wäg allfelige Wächsel i de Belegig und ere «chambre séparée» für miich als «ronfleur». Das chön er mer eerscht am Aabig säge, mäint de Schang, bis dänn chön s «l’ un ou l’ autre changement» gèè, «peut-être.»

zurück zu CD